Արդեն տևական ժամանակ է, որ Վրաստանի խորհրդարանի հայազգի  պատգամավոր Հենզել Մկոյանին հետապնդում են: Նա պնդում է՝ այս ամենն իր քաղաքական գործունեության պատճառով է:

Araratnews.am-ը վրացահայ պատգամավորի հետ խոսեց այդ սպառնալիքների, իր և իր ընտանիքի հետ կատարվող վերջին իրադարձությունների, տեղի ունեցած հարձակումների և ահաբեկչության մասին:

Պարո՛ն Մկոյան, խնդրում եմ պատմեք՝ ինչից սկսվեց այս լարվածությունը:

Իմ եղբայրը բիզնեսմեն է, ունի 300 –ից  ավելի աշխատող, երկու ֆիրմա: Նա առաջին հայ գործարան է Վրաստանում: Սամվել Պետրոսյան աշխատակիցը եղբորս հիդրոէլեկտրակայանում ասել է՝ ինձ վրա փոշի բարձրացրիր: Հետո քաղաքում հանդիպել են, քարով խփել է եղբորս աչքին, որի պատճառով  աչքի 40 տոկոսը չի տեսնում: Այդ մարդու դեմ գործ չհարուցեցին, չբռնեցին նրան:

Լարվածությունը սկսվեց այդ դեպքից: Դրանից հետո Սամվել Պետրոսյանի հայրը հայհոյել էր իմ եղբորորդուն, որից նա շատ ազդվել էր: Դեպքից հետո երիտասարդներով հավաքվեցին իմ տանից 100 մետր  հեռավորության վրա գտնվող սրճարանում՝ պարզելու Սամվելի հոր արարքի պատճառը: Ես գնացի ու երիտասարդներին բերեցի իմ տուն: Եկավ  Սամվել Պետրոսյանը զինված, զենքը հանեց, սկսեց կրակել: Դա սպանության փորձ էր: Իրավապահները խուլիգանության մեղադրանք առաջադրեցին նրան: Բայց չեմ կարող պնդել, որ այս դեպքը նախորդի հետ կապ ունի:

Հենզել Մկոյանի վրա կատարված հարձակումը կարող եք դիտել ստորև բերվող կադրերում:

Լարվածությունը հիմա պահպանվո՞ւմ է:

Այո: Այս տարի հուլիսի 20-ին ներկա էի մի միջոցառմանը Թբիլիսում: Միջոցառման ավարտից հետո եկա տուն, ինձ «whatsApp»-ով Վասիլի անունով մեկը զանգեց կովկասյան առոգանությամբ, գողականով, ռուսերեն ասաց. «Նստիր տանը, մի շարժվիր,  ոչ մի ընտրություն, հասկացա՞ր»: Ես էլ ասացի՝ իսկ եթե չհասկացա: Ասաց՝ մենք կվերցնենք քեզ հարազատ ամենաթանկ մարդուն, ու անջատեց հեռախոսը:

Հետո ինձ զանգ եկավ Մոսկվայից Թիֆլիսից  վերադառնալիս:  Ասացին՝ բարև օլիգարխ: Պատասխանեցի՝ ես օլիգարխ չեմ, քաղաքական գործիչ  եմ 21 տարի: «Մեզ չի հետաքրքրում: 5 մլն դոլար մեզ փող կուղարկես: Եթե չէ, մենք քեզ կսպանենք: Մարդիկ ունենք, որոնք  կողքին են, քո ամեն ինչը գիտեն, հիմա էլ դու նոր Թիֆլիսից եկար»,- ասաց ինձ զանգողը:

Այս ամենը ես ներկայացրել եմ Վրաստանի խորհրդարանին,  գլխավոր դատախազին: Սակայն նյութերն ուղարկեցին մարզային դատախազություն: Երբ ամբողջ աշխարհում  պատգամավորին  սպառնում են, գլխավոր դատախազությունն է ուսումնասիրում նյութերը: Փաստաբանս ասուլիս տվեց, ասաց, որ դատախազությունը գործն ուղարկել է մարզ: Այդ ամենից մի քանի օր հետո եղբորս հետ  մեքենայով գնացի նրա հիդրոէլեկտրակայան:  Մեքենայից իջնելուց եւ հիդրոէլեկտրակայան հասնելուց հետո պայթեցրին մեքենան, որի պատճառով եղբայրս կանտուզիա ստացավ: Պայթյունն այնքան ուժեղ էր, որ անգամ կողքի շենքում էին դա զգացել: Դա ահաբեկչություն էր:

Ինչպիսին է Վրաստանի կառավարության, պետության վերաբերմունքը:

Պետությունը տեր կանգնում է ինձ, բայց չգիտեմ՝ կբացահայտվի այս ամենը, թե  ոչ:

Այս ամենը, փաստորեն, առնչվում է ձեր քաղաքական գործունեության  հետ:

Այո:

Ովքե՞ր են ձեզ սպառնում:

Կռահում եմ՝ ովքեր են: Մի  տեսաուղերձ եմ նկարահանել: Եթե  իմ, իմ ընտանիքի հետ որեւէ բան պատահի, այդ ուղերձը կհրապարակվի, հայկական բոլոր համայնքներին, դեսպանատներին կուղարկվի:

Վիդեոյում տալի՞ս եք անուններ:

Այո, բայց այդ անունները կհնչեն, երբ ինձ, կամ իմ ընտանիքի անդամներին որեւէ բան պատահի:

Սոնա Դավթյան