Էջմիածնում 36-ամյա տղամարդու սպանության ու նրա ընտանիքի անդամների սպանության փորձի գործով նախաքննությունն ավարտվել է։ Նախաքննական մարմինը հիմնավորված է համարել, որ սպանությունը կատարել է նախկին ոստիկանն ու գործը մեղադրական եզրակացությամբ ուղարկել դատարան։
Ինչպես արդեն տեղեկացրել ենք՝ 2020թ փետրվարի 22-ին Էջմիածնում դաժան սպանություն է տեղի ունեցել։ 36-ամյա Գեւորգ Խալաթյանը սպանվել է՝ սեփական տանը՝ կնոջ և երկու անչափահաս դուստրերի աչքի առջև։ Կասկածյալը նախկին ոստիկան է՝ այդ տան նախկին սեփականատերը։ Վեճի առարկան էլ եղել է տունը։
Խնդիրն այն է, որ բնակարանը եղել է գրավի տակ, որը բանկը աճուրդի է հանել, իսկ անչափահաս երեխաների հայրը ձեռք է բերել այդ բնակարանն ու ընտանիքով տեղափոխվել այնտեղ՝ բնակվելու։ Նախկին ոստիկանը զինված գնացել է իր նախկին բնակարան, վիճել գնորդի հետ ու ինքնաձիգից կրակոցներ արձակել ոչ միայն նոր տանտիրոջ, այլև տանտիրուհու ուղղությամբ։
Գ.Խալաթյանի մարմնի վրա դատաբժիշկը արտաքին զննությամբ հայտնաբերել է չորս հրազենային վնասվածք։ Դեպքի առթիվ հարուցվել էր քրեական գործ, որի շրջանակներում ձերբակալվել, ապա կալանավորվել է տղամարդը։ Վերջինիս մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասի՝ սպանության, 34-104-րդ հոդվածի 2-րդ մասի՝ երկու կամ ավելի անձանց սպանության փորձի հատկանիշներով։
Դեպքից մեկ տարի անց «Փաստինֆո»-ին նոր մանրամասներ են հայտնի դարձել։ Այսպես, դեպքի օրը՝ 2020թ փետրվարի 22-ին ՝ ժամը 11։30-ի սահմաններում, Խալաթյանին սպանելու դիտավորությամբ տղամարդը «AKМ» տեսակի ինքնաձիգով և մարտական փամփուշտներով զինված գնացել է իր նախկին տան բակ, որտեղ այդ պահին հողագործական աշխատանքներով էր զբաղվում Խալաթյանը։ Տղամարդը ինքնաձիգով կրակոցներ է արձակել նրա մարմնի կենսական կարևոր նշանակություն ունեցող օրգաններին, ինչի հետևանքով Խալաթյանն ընկել է գետնին, ինչից հետո տղամարդն ինքնաձիգի փողն ուղղել է Խալաթյանի կրծքավանդակին և կրակոց արձակել՝ համոզվելու համար, որ վերջինս մահացել է։ Խալաթյանի կինը, լսելով կրակոցների ձայնը, մուտքի դռնից դեպի պատշգամբ է դուրս եկել, ինչը չի վրիպել զինված տղամարդու աչքից։ Վերջինս կրակահերթ է արձակել կնոջ և նրա հետ պատշգամբ դուրս եկած երկու անչափահաս երեխաների ուղղությամբ ։
Կինն արագ ներս է մտել և կողպել դուռը, իսկ տղամարդը շարունակել է կրակահերթ արձակել արդեն փակ դռան ուղղությամբ։ Փամփուշտները մխրճվել են տարածքում գտնվող փայտյա դռան, հյուրասենյակի պատի մեջ, կոտրել են ապակիները, սակայն կինն ու երեխաները բարեբախտաբար չեն տուժել։
Շուրջ մեկ տարի ընթացող նախաքննության ընթացքում տղամարդը գտնվել է անազատության մեջ։ Գործը կքննվի Արմավիրի մարզի ընդհանուր իրավասության դատարանում։
Աղբյուր' Փաստինֆո