Վրաստանում գործող 2.1 հազար պետական դպրոցներում սեպտեմբերի 4-ից ստուգումներ են սկսվել կորոնավիրուսային համաճարակի սահմանված կանոնների պահպանման ուղղությամբ։ Մոնիթորինգի գործընթացը պետք է ավարտվի մինչև նոր ուսումնական տարվա մեկնարկը՝ սեպտեմբերի 15-ը:
Գործունեության իրավունք են ստանում այն կրթական հաստատությունները, որոնք լիովին բավարարում են հակահամաճարակային կանոնների պահանջներին: Այս մասին այսօր հայտարարել են Վրաստանի առողջապահության նախարարությունից:
«Մինչ օրս ստուգվել է շուրջ 1500 դպրոց, որից թույլտվություն ենք տվել միայն 614 դպրոցի: 81 դպրոց չի բավարարել պահանջները»,- հայտարարել է նախարարության ներկայացուցիչը:
Ստուգումներն իրականացում են աշխատանքային տեսչությունների, հարկային ծառայության, սննդամթերքի ազգային գործակալության և քաղաքային ծառայությունների աշխատանքային խմբերը։ Այն դեպքում, երբ դպրոցը չի բավարարում սահմանված պահանջները, անձնակազմին տրվում է որոշակի ժամանակահատված թերությունները վերացնելու համար: Դրանից հետո կատարվում է վերստուգում: