UFC-ի նախկին մարտիկ Մեթ Բրաունն իր դժգոհությունն է հայտնել թեթև քաշային կարգի երկրորդ համար Արման Ծառուկյանի պահվածքի վերաբերյալ՝ օրերս տեղի ունեցած միջադեպից հետո։
UFC-ի հայ մարտիկը հանդես էր եկել RAF պրոմոուշենի մրցաշարում և հաղթանակ տարել: Սակայն գոտեմարտի ավարտից անմիջապես հետո նա մի քանի հարված էր հասցրել մրցակցին՝ դառնալով զանգվածային ծեծկռտուք հրահրող:
«Առաջին հերթին մտածեցի, որ այս ամենը շատ վատ է անդրադառնալու Արմանի վրա: Դանա Ուայթը այն կարծիքին է, որ Ծառուկյանը խնդիրներ է ստեղծում։ Նա վերջին պահին հրաժարվում է մենամարտից, օկտագոնից դուրս հարվածում է հանդիսատեսին և մրցակիցներին: Ինչո՞ւ UFC-ին ևս մեկ առիթ տալ: Դա պարզապես անիմաստ է: Արմանը հերթական անգամ ցույց տվեց, որ հաճախ անզուսպ է լինում: Նա պետք է սովորի հանգստանալ, մեկ քայլ հետ անել և կենտրոնանալ կոնկրետ նպատակի վրա»,- նշել է Բրաունը։
Նախկին մարտիկը նշել է, որ Ծառուկյանի գլխավոր նպատակը պետք է լինի բացառապես տիտղոսը.
«Ծառուկյանը պետք է մտածի միայն UFC-ի չեմպիոնական գոտու մասին: Ըմբշամարտի գոտեմարտերը որևէ նշանակություն չպետք է ունենան։ Նա սարսափելի որոշում կայացրեց, երբ հարձակվեց մրցակցի վրա։ Նրան հոգեբան է պետք կամ մեկ այլ մասնագետ, որը կօգնի կառավարել էմոցիաները։ Եթե Դանան որոշի այս միջադեպն օգտագործել Արմանի դեմ, ապա նա լրջորեն կզղջա իր արարքի համար»,-ասել է Բրաունը։
Ի դեպ, Մեթ Բրաունը UFC-ի կիսամիջին քաշային կարգի բացարձակ ռեկորդակիր է՝ ժամանակից շուտ տարած հաղթանակների և նոկաուտների քանակով։