Տնային կալանքում գտնվող Սամվել Կարապետյանի թիմակիցները փորձում են համոզել, թե իրենք նախկին իշխանությունների հետ կապ չունեն՝ չնայած այն հանգամանքին, որ Կարապետյանի եղբայրը՝ Կարեն Կարապետյանը, Սերժ Սարգսյանի կառավարման տարիներին եղել է ՀՀ նախագահի աշխատակազմի ղեկավարը:
Մարտի 31-ին ներկայացրել էինք Սերժ Սարգսյանի և ՀՀԿ-ի հետ կապակցված շուրջ 50 անուն, որոնք այսօր աջակցում են Սամվել Կարապետյանին:
Այս անգամ «Հայկական ժամանակ»-ի ձեռքի տակ են հայտնվել Ռոբերտ Քոչարյանի հետ աֆիլացված անձանց անուններ, որոնք նույնպես աջակցում են Կարապետյաններին:
Այսպիսով՝
Արամ Վարդևանյան. «Հայաստան» դաշինքի նախկին անդամ է, ՀՀ ԱԺ համանուն խմբակցության նախկին պատգամավոր, իսկ ներկայումս «Ուժեղ Հայաստան» կուսակցության խորհրդի անդամ է, Սամվել Կարապետյանի փաստաբանը:
Հայկ Ավագյան. 2021 թվականի ընտրություններին աջակցել է Ռոբերտ Քոչարյանին, իսկ 2023 թվականին՝ «Սրբազան պայքար» շարժմանը, ներկայումս «Ուժեղ Հայաստան» կուսակցության երևանյան գրասենյակներից մեկի ղեկավարն է:
Հովհաննես Հովհաննիսյան. նախկին դաշնակցական է, եղել է Արագածոտնի դաշնակցական նախկին մարզպետ Աշոտ Սիմոնյանի օգնականը, իսկ ներկայումս աջակցում է «Ուժեղ Հայաստան» կուսակցությանը:
Հովհաննես Հովհաննիսյանի հայրը՝ Աշոտ Հովհաննիսյանը, Դաշնակցության նախկին անդամ, եղել է Արագածոտնի մարզի Կաթնաղբյուր գյուղի ղեկավարը, իսկ ներկայումս աջակցում է «Ուժեղ Հայաստան» կուսակցությանը։
Հովիկ Մուրադյան. նախկինում սատարել է «Հայաստան» դաշինքին, եղել է ՀԷՑ ՓԲԸ «Գեղամա» մասնաճյուղի Վարդենիսի տեղամասի նախկին տնօրենը, այժմ «Ուժեղ Հայաստան» կուսակցության Գեղարքունիքի մարզի Վարդենիսի տարածքային գրասենյակի համակարգողն է:
Արամայիս Մուրադյան. նախկինում սատարել է «Հայաստան» դաշինքին, այժմ ՀՀ աշխատանքի և սոցիալական հարցերի նախարարության «Միասնական սոցիալական ծառայության» Վարդենիսի տարածքային կենտրոնի սոցիալական աշխատանքի և զբաղվածության ծրագրի բաժնի սոցիալական աշխատակից է և աջակցում է «Ուժեղ Հայաստան» կուսակցությանը:
Արսեն Միկոյան. նախկին դաշնակցական է, ներկայումս «Ուժեղ Հայաստան» կուսակցության Ստեփանավանի տարածքային կառույցի ղեկավարն է։ Մեր տեղեկություններով՝ նա ունի շփումների լայն շրջանակ տարածաշրջանի ազգաբնակչության հետ:
Կարեն Արշակյան. նախկին դաշնակցական է, եղել է Շիրակի մարզի Մարմաշեն խոշորացված համայնքի ղեկավարը, ինչպես նաև Ախուրյան խոշորացված համայնքի ղեկավարի տեղակալը, այժմ սատարում է «Ուժեղ Հայաստան» կուսակցությանը:
Նաիրի Մարտիրոսյան. եղել է Վայոց ձորի մարզի Եղեգնաձոր համայնքի Վերնաշեն բնակավայրի վարչական ղեկավարը: Նա անդամակցել է «Հայաստան» դաշինքին և ներկայումս աշխատում է «Գազպրոմ Արմենիա» ՓԲԸ Վայոց ձորի ԳԳՄ-ում, հարում է «Ուժեղ Հայաստան» կուսակցությանը:
Սերժ Սարգսյանի և ՀՀԿ-ի հետ կապակցված շուրջ 50 անուններին, որոնք այսօր աջակցում են Սամվել Կարապետյանին, կարող եք ծանոթանալ այստեղ: