Թուրքիայի Պաշտպանության նախարարությունը հայտարարել է, որ իր ռազմաօդային ուժերը Հյուսիսային Իրաքում չեզոքացրել են Քուրդիստանի աշխատավորական կուսակցության (PKK) 21 թիրախ:
Ըստ թուրքական ԶԼՄ-ների՝ գործողությունն իրականացվել է Թուրքիայի կողմից մշակված զինամթերքի առավելագույն օգտագործմամբ՝ Մետինայի, Գարայի, Հաքուրքի և Քանդիլի շրջաններում։
Նշվում է, որ ոչնչացվել են քարանձավներ, բունկերներ ու ապաստարաններ, որոնք օգտագործել է կազմակերպությունը։
Թուրքիայի ՊՆ-ն հայտարարել է, որ հարվածները հասցվել են ՄԱԿ-ի կանոնադրության 51-րդ հոդվածից բխող ինքնապաշտպանության իրավունքի համաձայն։
՛՛Գործողության նպատակն է՝ վերացնել Հյուսիսային Իրաքի տարածքից խաղաղ բնակչության և անվտանգության ուժերի վրա ահաբեկչական հարձակումների սպառնալիքը՝ չեզոքացնելով PKK-ի և այլ ահաբեկչական տարրերը, ինչպես նաև ապահովել Թուրքիայի սահմանների անվտանգությունը՛՛,-հայտնել են Թուրքիայի ՊՆ-ից: