Ես անմեղ մարդկանց չէի կարող մեղադրել․ Ջհանգիրյան

Ես անմեղ մարդկանց չէի կարող մեղադրել․ Ջհանգիրյան

Լրագրողների այն շեշտադրմանը, որ իրավապաշտպանների շրջանում կան մտահոգություններ Գագիկ Ջհանգիրյանի թեկնածության առաջադրման հետ կապված, քանի որ իր պաշտոնավարման տարիներին աղմկահարույց հանցագործություններ են կոծկվել, անմեղ մարդիկ են դատվել, Ջհանգիրյանը պատասխանեց․

«Հիմա 2 տարի քննչական դեպարտամենտում քննվում է Մատաղիսի գործը, բա ինչո՞ւ չեն բացահայտում իրական հանցագործներին, եթե դրանք կան և ինչո՞ւ ինձ մեղադրանք չեն առաջադրում և չեն առաջադրել նաև նախորդ իշխանությունները, որ ես էտտեղ հանցագործություն եմ կատարել»։

Այն նկատառմանը, որ նախկին և ներկա իշխանությունները մեղադրանք չեն առաջադրել, քանի որ Ջհանգիրյանը լոյալ է եղել իշխանությունների նկատմամբ, Գագիկ Ջհանգիրյանը հակադարձեց․

«2008 թվականին ինձ մեղադրել էին ոստիկանին հրելու համար։ Բա թող գտնեին մի լուրջ մեղադրանք՝ պաշտոնական դիրքի չարաշահում, սպանությունների կոծկում և ինձ լուրջ մեղադրանքով դատեին երկարաժամկետ ազատազրկման»։

Ջհանգիրյանի խոսքով՝ երբ Մատաղիսի գործով դատապարտյալները ազատվել են կալանքից և բաց են թողնվել, ինքն արդեն պաշտոնավարել է Դատախազությունում, և Զինվորական դատախազը եղել է Արմեն Խաչատուրյանը։

«Լրացուցիչ նախաքննության արդյունքներով նոր Զինվորական դատախազը նույն մեղադրյալներին, դատապարտյալներին նույն մեղադրանքներով հաստատել է մեղադրական եզրակացություն նույն հոդվածներով և ուղարկել է Դատարան։ Դատարանում, գործը քննելիս, Դատախազն արդեն եղել է Կոստանյան Գևորգը, ով գործը տարել է մինչև վերջ»,- մանրամասնեց իրավաբան — գիտնականը։

Ջհանգիրյանը այսօր էլ պնդեց, որ իր կարծիքը չի փոխվել, ինքը չէր կարող մեղադրել անմեղ մարդկանց։ Իսկ ԲԴԽ-ում պատկերացնում է իր աշխատանքը շատ լավ, բոլորը իր ուսանողներն են, ընկերներն են, ինքը վնգստացող դատավորների չի ճանաչում։