ԱԺ պատգամավորներ Ալեն Սիմոնյանի, Սիսակ Գաբրիելյանի և Թագուհի Ղազարյանի կողմից ներկայացվել է «Հայաստանի Հանրապետության օրհներգի մասին» օրենքում փոփոխություններ և լրացումներ կատարելու մասին նոր նախագիծը։

Նախագծով առաջարկվում է օրհներգի տեքստից հանել վերջին քառատողը, այն է՝

Ամենայն տեղ մահը մի է,

Մարդ մի անգամ պիտ մեռնի,

Բայց երանի, որ յուր ազգի Ազատության կզոհվի:

Եվ այն ավարտել՝ «թող միշտ պանծա Հայաստան» քառյակով՝

Նայիր նրան՝ երեք գույնով

Նվիրական մեկ նշան,

Թող փողփողի թշնամու դեմ,

Թող միշտ պանծա Հայաստան:

Մշակվել է ստանդարտ, որպեսզի բոլոր տեղերում հնչող ՀՀ օրհներգը լինի միասնական՝ ԿԳՄՍ կողմից հրապարակված տարբերակով:

Araratnews.am-ի հետ զրույցում  ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Սիսակ Գաբրիելյանը նշեց, որ փոփոխության հիմնական նպատակը միասնական ստանդարտի բերելն է, որ օրհներգը սկսվի և ավարտվի ՀՀ մասին խոսքերով՝ խորհրդանշելով Հայաստանի Հանրապետության ներկան, ապագան և հարատևությունը։