ՀՀ Ազգային ժողովի ՔՊ խմբակցության պատգամավոր Ալխաս Ղազարյանը իր ֆեյսբուքյան էջում գրել է․
«Հարգելի՛ հայրենակիցներ
Ազգային ժողովի հերթական նիստում քննարկվեց իմ և գործընկերներիս՝ Հակոբ Արշակյանի, Բաբկեն Թունյանի, Սոնա Ղազարյանի, Արուսյակ Ջուլհակյանի, Արսեն Թորոսյանի, Մարիամ Պողոսյանի և Հասմիկ Հակոբյանի կողմից ներկայացված «Առևտրի և ծառայությունների մասին» օրենքում լրացումներ կատարելու մասին» և կից օրենքներում լրացումներ կատարելու մասին» օրենքների նախագծերի փաթեթը։
Նախագծերի փաթեթի ընդունումը պայմանավորված է բնակչության, հատկապես՝ մինչև 18 տարեկան անձանց առողջության պահպանման նպատակով էներգետիկ ըմպելիքների շրջանառության սահմանափակման իրավական հիմքերի ստեղծման անհրաժեշտությամբ։
Նախագծերի փաթեթով առաջարկվում է.
• Օրենքով ամրագրել «էներգետիկ ըմպելիք» հասկացությունը։
• Արգելել մինչև 18 տարեկան անձանց էներգետիկ ըմպելիքների վաճառքը։
• Սահմանափակել էներգետիկ ըմպելիքների գովազդի հնարավորությունները։
• Արգելել ոչ պատշաճ (ապրանքի իրական բովանդակությունը չբացահայտող) գովազդի հեռարձակումը։
• Սահմանել էներգետիկ ըմպելիքների գովազդի հեռարձակման ժամանակային տիրույթ։
• Սահմանել վարչական պատասխանատվություն՝ նշված սահմանափակումներն ու արգելքները խախտելու համար:
Այս փոփոխությունները կարևոր քայլ են մեր երեխաների և երիտասարդների, մեծ առումով՝ հանրային առողջության պահպանման համար»: