Լապշինը դիմել է խորհրդանշական քայլի` ՄԻԵԴ վճռով Ադրբեջանից փոխանցվելիք 30 000 եվրոն ստանալու համար հաշիվ բացելով «Արցախբանկ»-ում

Լապշինը դիմել է խորհրդանշական քայլի` ՄԻԵԴ վճռով Ադրբեջանից փոխանցվելիք 30 000 եվրոն ստանալու համար հաշիվ բացելով «Արցախբանկ»-ում

Ռուսաստանցի և իսրայելցի բլոգեր Ալեքսանդր Լապշինը Մարդու իրավունքների եվրոպական դատարանի վճռով Ադրբեջանից փոխանցվելիք գումարը ստանալու հարցում դիմել է խորհրդանշական քայլի' որոշելով բանկային հաշիվ բացել «Արցախբանկ»-ում:

 

«Բանկում հաշվեհամար եմ բացել, Ստրասբուրգի Եվրոպական դատարանի որոշմամբ, Ադրբեջանից 30 000 եվրո փոխանցումը ստանալու համար»-իր ֆեյսբուքյան էջում գրել է բլոգերը' կցելով «Արցախբանկ»-ի կրեդիտ քարտի լուսանկարը:

 

Մայիսի 20-ին Մարդու իրավունքների եվրոպական դատարանը (ՄԻԵԴ) Ադրբեջանի իշխանություններին մեղավոր է ճանաչել ռուսաստանցի և իսրայելցի բլոգեր Ալեքսանդր Լապշինի նկատմամբ մահափորձ կատարելու համար: Այս մասին Լապշինը գրել էր իր ֆեյսբուքյան էջում:

 

«Հաղթանա՛կ: Մարդու իրավունքների եվրոպական դատարանն Ադրբեջանի իշխանություններին մեղավոր է ճանաչել Բաքվի բանտում իմ դեմ սպանության փորձ կատարելու և դաժան կտտանքներ կիրառելու համար: Ադրբեջանին պարտավորեցրել են ինձ 30 000 եվրո փոխհատուցում վճարել: Իմ հարգելի փաստաբաններ Կարինա Մոսկալենկո և Աննա Մարալյան, դուք գերպրոֆեսիոնալներ եք, ես սիրում եմ ձեզ»,-գրել է Լապշինը:

 

Հիշեցնենք, որ Բաքվի ծանր հանցագործությունների դատարանը բլոգեր Ալեքսանդր Լապշինին դատապարտել էր երեք տարվա ազատազրկման: Ինչպես նշվել է դատավճռում, Ալեքսանդր Լապշինը մեղավոր էր ճանաչվել 318.2 հոդվածով, որը նախատեսում է պատիժ «հանցավոր խմբի կազմում Ադրբեջանի պետական սահմաններն անօրինական կերպով հատելու համար»: Ռուսաստանի, Իսրայելի և Ուկրաինայի քաղաքացի հանդիսացող բլոգեր Ալեքսանդր Լապշինը ձերբակալվել էր Մինսկում 2016 թվականի դեկտեմբերի 15-ին՝ Ադրբեջանի դիմումի համաձայն, և արտահանձնվել Բաքվին 2017 թվականի փետրվարի 7-ին՝ 2011 թվականի ապրիլին, 2012 թվականի հոկտեմբերին և 2016 թվականի հունիսին Արցախ այցելելու, ինչպես նաև Ադրբեջանի քաղաքականությունը քննադատելու համար: Ավելի ուշ Լապշինը լքել է Ադրբեջանի տարածքն ու մեկնել Իսրայել: